Kjallarinn.net

Blog

  • Óbeislað afl…

    Samfélagið – Frumkvæði er ein af nýjustu afurðum Hugmyndaráðuneytisins. Það er sérstaklega jákvætt og gott starf sem þar er unnið. Ný fersk hugsun og vettvangur fyrir jákvæða orku og samstarf þar sem veikleikum er breytt í styrkleika.

    Mæli með að þú kynnir þér málið og besta að taka þátt:

    Tækifærið með hið óbeislaða vinnuafl þjóðar

    Hugmyndaráðuneytið hefur verið að vinna undanfarinn mánuð að verkefni sem kemur að úrlausn mála fyrir allt það hæfileikaríka fólk sem hefur tíma á lausu í sumar og á komandi misseri.

    Samfélagið FrumkvæðiVerkefnið hefur fengið heitið Frumkvæði og verður kynnt með prompi og pragt í húsnæði Hugmyndaráðuneytisins í Hugmyndahúsinu, Grandagarði 2 kl. 10.00 á mánudaginn. Katrín Jakobsdóttir, menntamálaráðherra mun þá kynna verkefnið og opna fyrir undirbúningsvefinn.

    Hugmyndin á bak við verkefnið er að bjóða upp á öflugt umhverfi til að samræma og bjóða öllu því óbeislaða vinnuafli landsins uppá tækifæri til sköpunar og athafna. Verkefnið mun hefjast í sumar þegar Samfélagið Frumkvæði mun opna á vefnum.

  • Jóhanna – Is it true?

    Til hamingju með flott lag og að komast áfram!

    Allir sem horfðu á forkeppnina í gær hér á heimilinu voru sammála um að lagið og flutningurinn hefði borið af. Langbest 🙂

    Nú er bara að sjá hvort lagið kemst ekki lengra…

  • Kerfishrun?

    Ég setti inn eftirfarandi athugasemd hjá Vilhjálmi Þorsteinssyni þar sem hann setur fram skuldastöðu heimilanna á grafísku formi.

    Mjög skýrt fram sett, en niðurstaðan að mínu mati röng. Maður hefði einmitt haldið að hér þurfi réttlætissjónarmið að komast að. Hélt eiginlega að svona félagshyggjustjórn myndi taka skýrari afstöðu MEÐ þegnum landsins.

    Það eru AFAR óvenjulegir atburðir sem hafa orðið. Þeir hafa orðið af völdum banka og stjórnvalda. Því þarf að beita óvenjulegum aðferðum og við þurfum HUGRAKKA stjórnmálamenn.

    Leiðinlegt að sjá rök um að eitthvað sé “framsóknarhugmynd” og þar með óþarfi að ræða frekar!

    Einnig finnst mér villandi að tala um “aðstoð” þegar réttara væri að ræða um “leiðréttingu”.

    Hættan á algeru kerfishruni held ég að sé talsverð og svona hroki eins og mér fannst ég heyra á Gylfa og fleiri ráðherrum hjálpar þar ekki til. Hver væru áhrifin af því að 40-50 þúsund heimili hættu að borga? Hver borgar skattana ef stór hópur skattborgara er gjaldþrota eða flúinn af landi? Hvað verður um eignaverðmæti eigna sem enginn vill búa í?

    Held að það verði að finna almenna lausn sem byggir á sanngirni og því að koma í veg fyrir fólksflótta og upplausn.

    Hann svarar nú ekki þessum athugasemdum beint, en ég held að þetta sé stóra málið. Vilhjálmur er tölvumaður og ætti að þekkja það að ef tölvur frjósa þarf að fara í stórar aðgerðir og jafnvel þarf að endurræsa.

    Sama held ég að eigi við um fjármálaástandið núna. Það hefur orðið KERFISHRUN (gengishrun, bankahrun, stjórnmálahrun o.s.frv.)

    Getur ekki verið að eina leiðin sé að beita samsvarandi aðferðum?

  • Hagfræðifyrirlestur – Áhugavert…

    Kjallaragenginu var að berast upplýsingar um áhugaverðan fyrirlestur:

    William K. Black: Why Economists Must Embrace the “F” Word (Fraud)?
    Hefst: 11/05/2009 – 12:00
    Lýkur: 11/05/2009 – 14:00
    Staðsetning viðburðar:
    Askja
    Nánari staðsetning:
    Stofa 132

    William K. Black prófessor er frá University of Missouri.

    William Black hefur ritað bók um rán á banka innanfrá „The Best Way to Rob a Bank is to Own One”.

    Í fyrirlestrinum mun William Black fjalla um það að hagfræði hefur ekki tekið fjársvik alvarlega og skorturinn á skýrri hagfræðikenningu um fjársvik í rekstri fyrirtækja leiði af sér rangar spár og rangar niðurstöður um samhengi ýmissa stærða í hagfræði, að ekki sé talað um röng viðhorf og vinnubrögð, sem síðan geta af sér glæpi í efnahagslífinu og meðfylgjandi faraldra hvítflibbaglæpa og kreppur með reglulegu millibili.

    Að loknum fyrirlestri Blacks mun Egill Helgason blaðamaður stjórna umræðum með frummælandanum, Gunnari Þ. Andersen forstjóra Fjármálaeftirlitsins og Ólafi Ísleifssyni lektor við Háskólann í Reykjavík í pallborði.

    Allir velkomnir.

    Aðgangur ókeypis.

    Hvetjum alla sem áhuga hafa á að mæta…

  • Mótmæli vegna aðgerðarleysis stjórnvalda

    Tilkynning frá Nýjum Tímum.  Hagsmunasamtök Heimilanna taka undir kröfurnar sem hér koma fram:

    Á morgun, föstudaginn 8. maí 2009 verða mótmæli vegna
    aðgerðarleysis íslenskra stjórnvalda gagnvart stöðu heimilanna í landinu.

    Staðsetning Alþingishúsið klukkan 13:00

    Fjölmennum því á morgun við Alþingishúsið klukkan 13:00, göngum síðan upp að Stjórnarráði þar sem ríkisstjórnin mun sitja að störfum og látum í okkur heyra.

    Við viljum minna stjórnvöld á að heimili landsmanna eru að brenna upp í skuldum og að sú “Skjaldborg” se mslá átti um hemilin sé hvergi sjáanleg.

    Þolinmæði flestra íslendinga er að þrotum kominn!

    Almenningur í landinu hefur þurft að sýna ótakmarkaða þolinmæði gagnvart stjórnvöldum sem á móti sýna l andsmönnum enga vægð þegar að innheimtuaðgerðir eru annars vegar.

    Margir sjá sér ekki annara kosta völ en að fara i greiðsluverkfall.

    Slagorð:

    1. Aðgerðir eru valkostur!

    2. Greiðsluverkfall – lokaúrræði?

    3. Skjalborg óskast!

    4. Björgum heimilunum!

    5. Heimilin í forgang!

    Í gegnum tíðina hafa stjórnvöld hlustað þegar að almenningur fjölmennir og mótmælir, reynslan hefur sýnt okkur það og kennt okkur það að samstaða er það eina sem skiptir máli.

    Sýnum samstöðu – Mætum öll!

    Nýir Tímar

  • Tilgangsleysi allra hluta…

    …eða “Story of Stuff”

    Saga “hluta” rakin frá auðlindum, framleiðslu, sölu, notkun og þar til þeir verða að úrgangi. Skýrir á myndrænan hátt hvernig allir þessir hlutir í kringum okkur hafa áhrif á samfélagið bæði nær og fjær og hvernig þetta er meira og minna hulið fyrir hinn venjulega neytanda.

    Story of Stuff er rúmar 20 mínútur þar sem hratt er farið yfir en samt skyggnst undir yfirborð framleiðslu og neyslumynsturs.  Hér er sýnt fram á tengsl við umhverfisáhrif og þjóðfélagsleg áhrif. Gæti jafnvel kennt þér eitthvað eða komið til að brosa og hver veit nema þú lítir málin öðrum augum eftir en áður…

    Gaman að sjá hvernig stóru fyrirtækin hafa stjórnmálamennina í vasanum – greinilega til í útlöndum líka 🙂

    Hvað finnst þér?

  • Aðgerðalisti Stjórnvalda?

    Marínó G. Njálsson hefur verið öflugur talsmaður í Samtökum Heimilanna. Nú brýtur hann niður listann sem stjórnvöld hafa verið að hreykja sér af.  Af 20 liðum sem taldir eru upp er nettó kostnaður ríkisins kannski 100 milljónir. Berum það saman við 200 milljarða sem fóru í að bjarga peningasjóðum bankanna.

    Niðurstaðan er að ekki á að kosta neinu til í byggingu “Skjaldborgar um heimilin”. Fjármagnseigendur eiga fyrir einhverja galdra að halda sínu en saklausum skuldurum ætlað að borga fall bankanna.

    Heldur máttlausar aðgerðir, enn sem komið er.

    Skilaboð Marínó eru skýr:

    • Vaknið af dvalanum og farið að gera eitthvað sem skiptir máli fyrir heimilin í landinu.
    • Samþykkið án tafar tillögu talsmanns neytenda um gerðardóm.
    • Breytið lögum þannig, að hægt sé að fara í hópmálssókn.
    • Stuðlið að því að hægt sé að leita á skjótvirkan hátt úrlausnar á ágreiningsmálum um lögmæti gengisbundinna lána og forsendubrests verðtryggðra lána.
    • Skapið atvinnulífinu eðlilegt rekstrarumhverfi svo hægt sé að fjölga störfum í landinu.
    • Skapið heimilunum í landinu eðlileg skilyrði svo þeim hætti að blæða.

    Við þessa upptalningu ætla ég að bæta:

    • Athuga þarf lög og reglur vegna ábyrgðarmanna.
    • Skuldir nái eingöngu til veðsettrar eignar.

    Auðvitað er ekki hægt að ætlast til að öllu þessu verði komið í gagnið strax – en væri gaman að sjá EITTHVAÐ gerast.

  • Gæslumenn Kerfisins?

    Það er nú nokkuð skondið að heyra í ýmsum liðsmönnum ríkisstjórnarflokkanna nú rétt eftir að þeir hafa náð kosningu.

    Þar er nú ekki lengur að heyra neina auðmýkt gagnvart þegnum landsins. Þvert á móti er þeim sýndur puttinn.

    Sighvatur Björgvinsson sem Eysteinn Jónsson hefði nefnt “uppgjafar pólitíkus” og Gylfi Magnússon sem er allt í einu búinn að snúast 180° frá fyrri yfirlýsingum eru þar gott dæmi. Jóhanna og Steingrímur fylgja síðan fast eftir.  Þetta fólk virðist vera dottið úr sambandi við þjóðina og orðið að stöðnuðum kerfisköllum. Getur verið að þau hugsi: “Að tala niður til fólks er góð skemmtun?”

    Elías Pétursson skrifar sérstaklega áhugaverða grein sem Egill birtir í Silfrinu. Ég get tekið undir hvert orð.

    Málið er að ef ekki á illa að fara verður að bregðast við með óvenjulegum aðferðum. Ef all stór hópur fólks hættir að greiða verður hér kerfishrun af áður óþekktri stærð. Auðvelt að sjá að ef allir fara af landi brott eða hætta að borga – verða engar skuldir greiddar.

    Krafan um niðurfellingu skulda við þessar aðstæður er bæði réttlát og skynsamleg.

    Sá hópur sem er skuldum vafinn eftir bankahrunið er sá hópur sem á að standa undir velferðarkerfinu. Ef honum er ekki gert það mögulegt – verður ekkert velferðarkerfi. Þá er lítill þörf fyrir lúxus eins og stjórnmálamenn.

    Skilboð dagsins:

    Vaknið! Takið stöðu með fólkinu sem býr í landinu.

  • Niðurfærsla Lána?

    Nú hefur talsmaður neytenda stigið fram og sent erindi til Forsætisráðherra vegna íbúðarlána.

    Bréfið byrjar þannig:

    Efni: Tillaga um neyðarlög í þágu neytenda þar sem kveðið verði á um

    • eignarnám íbúðarveðlána til neytenda,
    • niðurfærslu allra íbúðarveðlána til neytenda
    • eftir mati lögbundins, sérstaks gerðardóms.

    Útdráttur
    Talsmaður neytenda bregst hér með við brotum gegn hagsmunum og réttindum neytenda með því að leggja til að

    • öll íbúðarveðlán í landinu í eigu annarra en íbúðarlánasjóðs verði tekin eignarnámi með lögum;
    • kröfuhöfum verði bætt eignarnámið eftir verðmati í samræmi við almennar reglur;
    • kröfur á hendur neytendum verði færðar niður eftir mati lögbundins, sérstaks gerðardóms samkvæmt almennum mælikvarða eða mælikvörðum sem byggi á málefnalegum sjónarmiðum sem lögð eru til í tillögu þessari;
    • í þessu felist bindandi leiðrétting í eitt skipti vegna óvænts og skyndilegs atburðar sem engin skynsamleg rök voru fyrir neytendur að gera ráð fyrir

    Sjá nánar á vef talsmanns neytenda.

    Þetta er mjög í anda þess sem Björn Þorri hefur nefnt áður og líka Hagsmunasamtök heimilanna.

    Nú er bara að sjá hvort stjórnvöld bregðast hratt og vel við.  Þetta er gríðarlega mikilvægt mál – sérstaklega ef við viljum byggja nýja Ísland á réttlæti.

  • Aðildarumsókn

    Hvað er eðlilegt framhald í samningaviðræðum Samfylkingar og Vinstri grænna. Vinstri grænir hafa sagt kjósendum sínum að þeir séu hlyntir því að láta þjóðina ráða varðandi samning um aðild að ESB. Þeir hafa gefið í skyn að þeir vilji jafnvel þjóðaratkvæðagreiðslu um það hvort sækja skuli um. Hinn stjórnarflokkurinn hefur sagt að hann vilji aðildarumsókn strax án þess að þjóðin sé spurð um það sérstaklega áður. Rökin: Við megum engan tíma missa og að þeir sem hafa forsjá mála hjá ESB núna séu vinir okkar hjá ESB, finnar og svíar. Staðan virðist því vera sú að semja þarf um hvað hratt er farið í málin og hvort spyrja eigi þjóðina áður en umsókn er formlega send til ESB. Hvernig sem á er horft virðast Vinstri grænir ekki trúverðugir í sínum máflutningi nema þeir samþykki annað hvort áætlun um hvenær sótt er um eða hvenær þjóðin er spurð. Nú virðast varaformenn flokkanna hafa fengið það verkefni í fangið að lenda því hvor leiðin er farin. Vonandi bera þau gæfu til að finna samningsflöt þar sem sett er fram tímasett áætlun um framangreint. Það að segja að niðurstaða kosninganna hafi ekki verið krafa um aðildarumsókn má styðja rökum. Hitt má ekki síður styðja rökum að niðurstaðan hafi verið sú þjóðin hafi treyst þessum tveimur flokkum að ráða málinu til lykta. Hitt er svo staðreynd að Samfylkingin er nú stærsti flokkurinn og setti þetta mál á oddinn. Hún hefur jafnframt aðra kosti til stjórnarmyndunar. Því hníga rök að því að sjónarmið Samfylkingar eigi að ráða miklu um niðurstöðuna. Auðvitað ráða ekki síður hinu brýnu mál endurreisnar efnahagskerfisins en þar hefur Samfylkingin sett umsókn um aðild sem hluta af þeirri heildarlausn. Úrlausn þessa máls hlýtur því að vera brýnt frá öllum hliðum séð, að ekki sé talað um ákall atvinnulífsins um nýjan gjaldmiðil og stöðugleika til framtíðar. Það að skipta um gjaldmiðil er nauðsynlegt og um leið endurreisn á trúverðugleika íslensks efnahagslífs. Vera kann að aðrir möguleikar séu til staðar en sterk undiralda aðilarumsóknar krefst þess að það mál sé leitt til lykta. Nú er tími orða að líða á enda og tími aðgerða að hefjast. Ágætu stjórnmálamenn! Hefjið verkið og segið okkur hvernig að því skuli unnið.

    Reykjavík, 28. apríl 2009

  • Lögsækjum bankana!

    Björn Þorri Viktorsson er einn af þeim fáu mönnum sem tala “á íslensku” um ástandið í fjármálum þjóðarinnar. Hann var góður í Silfri Egils í dag og bendir á að það sé mikið vafamál að skuldir einstaklinga séu meðhöndlaðar með  réttum hætti og geti hugsanlega verið um lögbrot að ræða.

    Lögbrot bankanna felast í stöðu þeirra gegn krónunni (og þar með gegn hagsmunum viðskiptavina sinna) og hreinlega hvort erlend lán hafi í raun verið heimil.

    Björn Þorri er að leita að hópi til að sækja málið.

    Hvet þig til að lesa skilmerkilega grein Björns Þorra um stöðu skuldara og undirbúning að lögsókn

    og

    vera með í hópmálssókn gegn bönkunum…

    Hvers vegna tala stjórnmálamenn ekki um þetta?

  • Hvað á að kjósa?

    Ég var að prófa að máta saman mínar skoðanir við stefnu flokkanna með því að nota Kosningakompás MBL. – Bráðsniðugt tól. Ekki síst þar sem flokkarnir eru óvenju ósamstilltir við vilja þjóðarinnar um þessar mundir.

    Niðurstaðan var þessi:

    Kosningakompás mbl.is – niðurstaða

    Samsvörun svara þinna við svör flokkanna er sem hér segir:

    Flokkur Samsvörun
    Borgarahreyfingin (O) 84%
    Samfylkingin (S) 76%
    Frjálslyndi flokkurinn (F) 69%
    Framsóknarflokkur (B) 66%
    Vinstrihreyfingin – grænt framboð (V) 64%
    Lýðræðishreyfingin (P) 60%
    Sjálfstæðisflokkur (D) 48%

    Miðað við þetta ætti ég að kjósa Borgarahreyfinguna og það er reyndar margt sem bendir til að ég geri það.

    Hvað ætlar þú að kjósa?