Kjallarinn.net

Stjórnvöld geri sér ekki of miklar vonir…

Það er oft gott að horfa á málin frá “hinni” hliðinni. Það var t.d. frábært að heyra það sagt að “heimilin hafa ekki efni á að aðstoða bankana eftir hrunið” í stað ruglsins um að ekki séu til peningar til að hjálpa almenningi.

Þegar ráðherra í ríkisstjórn biður almenning að “gera sér ekki of miklar vonir”  er vissulega nokkur sannleikur í því. Held að það séu einmitt fáir sem “gera sér miklar vonir”.

En stjórnvöld (fjórflokkurinn) á heldur ekki að “gera sér miklar vonir”. Von þeirra virðist vera sú að almenningur sitji þegjandi undir því sem þau ákveði á lokuðum fundum með útvöldum (og innmúruðum?) ráðgjöfum og án samráðs um breiða sátt við heimilin í landinu.

Reyndar virðist smátt og smátt vera að rofa til í hausnum á stjórnvöldum og fulltrúar skuldara (Hagsmunasamtaka Heimilanna) jafnt sem kröfuhafa fengnir að borði.

Það er vel.

Nú er bráðum ár liðið frá hruninu mikla og enn ríkir gríðarleg óvissa. Hér þarf að hafa hraðar hendur og skapa viðunandi lífskjör í landinu. Koma í veg fyrir frekari eignaupptöku og snúa vörn í sókn.

Þær aðgerðir sem þarf að vinda sér í:

• Leysa skuldavanda heimilanna með ALMENNUM aðgerðum.
• Breyta lögum um veðsettar skuldir, þ.a. þær nái eingöngu til veðsettu eignarinnar.
• Hreinsa upp og ákæra EINSTAKLINGA sem báru ábyrgð á hruninu.
• Leita ráða hjá breiðri fylkingu sérfræðinga um endurreisn og endurnýjaða framtíðarsýn.
• Og umfram allt að tala við þjóðina (en ekki til hennar).

Sjálfsagt mætti hafa mörg orð um hvern þessara liða, en ég læt þetta duga í bili.

Það er því á þessum tímapunkti afar mikilvægt að VEKJA vonir hjá fólki um bjarta framtíð. Það er verkefni stjórnvalda.

Týnd skjöl?

Að gefnu tilefni er rétt að rifja upp hvernig skjöl eru  flokkuð hjá opinberum aðilum.

Ég hef það eftir áreiðanlegum heimildum frá fyrstu hendi að það séu tveir flokkar skjala:

Í fyrsta lagi “under consideration” – þetta eru mikilvæg skjöl sem eru týnd.

Í öðru lagi eru skjöl sem eru flokkuð sem “under active consideration” – þessi mikilvægu skjöl eru líka týnd en verið að leita að þeim!

Guinnes og Jóga?

Félagi úr Guinnesklúbbnum sendi mér þessa athyglisverðu sönnun á því að Jóga og Guinnes eru í raun ekki svo ólík þegar að er gáð.

Rannsóknir staðfesta nefninlega að Guinnes bjór hefur sömu jákvæðu áhrif og Jóga !!!

Savasana

Staða fullkominnar slökunar.

Balasana

Staða sem gefur tilfinningu fyrir friði og ró.

Setu Bandha Sarvangasana

Þessi staða kyrrir hugann og endurnærir þreytta fætur.

Marjayasana

Staða sem örvar mjaðmir og hrygginn.

Halasana

Frábært fyrir bakverki og svefnleysi.

Dolphin

Frábært fyrir axlasvæðið, brjóstkassa, fótleggi og handleggi.

Salambhasana

Frábær æfing til að örva mjóhrygginn, fótleggi og handleggi.

Ananda Balasana

Þessi staða hentar vel til að nudda mjaðmasvæðið.

Malasana

Þessi staða er fyrir ökkla og bakvöðva.

Pigeon

Mótar líkamann og eykur sveigjanleika og hjálpar til að losna við streitu.

Svo – byrjum að drekka Guinness………..

Allt farið til andskotans?

Við lifum nú mestu umbrotatíma í sögu landsins.

Hvernig brugðist verður við er stóra málið.

Nú er liðið næstum því heilt ár frá hruninu og lítið bólar á aðgerðum fyrir fyrirtæki og heimili.

Mér finnst verulega skrítið hvernig stjórnmálamenn taka á málum – rétt eins og þetta komi þeim ekki við.

Ég lít nú á stjórnmálamenn þannig að þeir séu hluti af vandamálinu, vanhæfnir upp til hópa og skortur á framtíðarsýn er mikill. Ráðherrar tala niður til fólks og vilja ekki hlusta á rök um réttlæti og sanngjarna dreifingu kostnaðar við fall bankana.

Meðan lykil markaðir eins og fasteignasala, bílainnflutningur og byggingariðnaður eru botnfrosnir virðast menn bara sitja hjá og horfa úr fílabeinsturninum.

Munum að Ísland er í samkeppni við önnur lönd um fólk (sem stundum er talað um sem vinnuafl). M.a. með því að bjóða upp á hagstætt umhverfi fyrir einstaklinga, fyrirtæki og fjölskyldur.

Hvenær koma aðgerðir?

Hverjir munu njóta?

Hverjir verða gerðir útlægir?

Ég hallast að því að nú þurfi ALMENNAR aðgerðir sem sátt er um. Nú þarf að horfa á stóru myndina.

Svindl útsölur?

Svindl útsala?

Hjólaverslanir auglýsa nú grimmt “útsölur”. Þegar betur er að gáð virðist samt eitthvað skrítið vera í gangi.

Á myndinni er vinsælt hjól sem er auglýst á vef Everest á 44.995 krónur. Með auglýstum 30% afslætti á öllum hjólum ætti það því að kosta 31.496. En – viti menn – “útsöluverðið” er enn um 42.000 krónur og verðið virðist því fyrst hafa verið hækkað um 30% og síðan gefinn 30% afsláttur frá því verði!

Tær snilld – eða svindl?

Auðvitað segjast þeir vera búnir að hækka verðið fyrir löngu.

Það ber að nefna að aðrar hjólaverslanir virðast beita sömu aðferðum.

Ætli Dr. Gunni viti af þessu?

Icesave og Hagsmunagæslan?

Davíð og hagsmunagæslan

Mætti á samstöðufundinn á Austurvelli í dag. Leið dálitið skringilega að sjá að Davíð Oddson var þarna rétt hjá. Gárungarnir með þetta skemmtilega skilti notuðu tækifærið og stilltu sér upp fyrir aftan hann.

Sumir myndu kalla hann kaldann að mæta þarna – einn aðalarkítektinn að hruninu…

Stundum segir ein mynd meira en mörg orð.

Grunngildin?

Í gærkvöldi fór ég á kynningu á aðferðafræði sem nefnd er „Spiral Dynamics“ sem er notuð til að greina hugarfar og grunngildi í samfélögum. Kynningin var á vegum Hugmyndaráðuneytisins og voru þeir Bjarni Snæbjörn Jónsson og Lárus Ýmir Óskarsson sem töluðu.

Það var fróðlegt að hlusta á hvernig mannlegar áherslur endurspeglast í þjóðfélaginu og hvernig ójafnvægi í áherslum getur verið varasamt. Einnig hvernig grunngildin skapa möguleika á að þróast og glíma við sérstakar aðstæður – eins og nú eru uppi.

Með því að skilja þessa þróun eru möguleikar á að lausnir finnist til betra lífs sem reyndar kallar aftur á ný vandamál og nýjar lausnir. Þá var vitnað í Einstein sem sagði: “Við leysum ekki vandamálin með sama hugarfari og skapaði þau.”

Rannsóknir sem þeir gerðu sýndu að þjóðfélagið á Íslandi er vanþroska á reglugerðarsviðinu. Það rímar ágætlega við það sem við sáum við bankahrunið. Líka fróðlegt að sjá mælingar fyrir og eftir hrunið.

Aðferðafræðin notar liti til að tákna mismunandi þroskastig:

• Beis – Grunnþarfir og barátta
• Fjólublár – Ættarveldið
• Rauður – Sjálfshjálp
• Blátt – Reglur og hlýðni
• Appelsínugult – Markaðshugsun og eiginn gróði
• Grænt – Félagshugsun og samvinna

Þróunin sveiflast síðan milli “ég” og “við” og lítill skilningur milli stiga. Þjóðfélög eru stödd mislangt á vegi í hverjum þætti og þarf að stíga á hærra svið til að skilja og leggja til leiðir sem eru skynsamlegar.

Á því sviði koma tvö önnur þroskastig:

• Gult – Sjálfshjálp með skilningi á heildarhagsmunum
• Sægrænn – Heildarsýn

Staða íslenskra stjórnmála er fróðleg í þessu ljósi. Það sem við þurfum er samfélag sem byggir á markaðshugsun og samfélagshugsun. Flokkakerfið eins og það er nú var byggt upp á síðustu öld með allt aðrar áherslur. Annaðhvort breytast þeir eða við þurfum nýja…

Ekki Flokka Sorpið!

Það er ótrúlegt hversu jákvætt fólk getur verið að auka við vinnuframlag sitt fyrir ríkið. Við sjáum þetta til dæmis skýrt varðandi flokkun á rusli. Okkur er talin trú um að flokkun sé afskaplega umhverfisvæn, spari þjóðfélaginu ómældar upphæðir og sé atvinnuskapandi.

Ef betur er að gáð orkar þetta nú mikið tvímælis, svo ekki sé fastar að orði kveðið.

Ef það kostar meira að farga rusli með flokkun á einfaldlega að hætta því!

Hér þurfa að liggja fyrir nákvæmar tölur um hagkvæmni.

Við vitum að álumbúðir eins og áldósir er hagkvæmt að safna saman og selja til endurbræðslu. Við sem neytendur fáum líka borgað fyrir að skila slíkum umbúðum inn.

Ef við tökum aftur á móti t.d. sérflokkun mjólkurumbúða lítur dæmið allt öðru vísi út. Við þurfum að skola umbúðirnar úr vatni, við þurfum að hafa sérstakar söfnunarumbúðir sem taka pláss. Við þurfum síðan að aka með umbúðirnar (nota bensín) á næstu mótttökustöð (sem þarf líka sitt pláss og gám. Gáminn þarf síðan að flytja eitthvert til að hægt sé að endurvinna  umbúðirnar (sem reyndar er örugglega ekki nokkur leið þar sem þær eru blanda af pappír og plasti).

Það þarf allavega að sannfæra mig með sterkum rökum að svona þegnskylduvinna þjóni raunverulega einhverjum tilgangi (öðrum en að halda fólki uppteknu).

Stýrikerfi: Google eða Microsoft?

Undanfarin ár hefur sterkasta vígi Microsoft verið stýrikerfið Windows.

Nú hefur Google lýst yfir að þeir ætli að bjóða stýrikerfi fyrir einkatölvur. Stýrikerfið nefna þeir Google Chrome OS og vísa þar í Chrome vafrann sem náð hefur miklum vinsældum. Stýrikerfið verður þannig byggt á vafranum og fellur vel inn í alla flóru kerfa sem Google hefur verið að þróa og byggja á veftækni.

Það er augljóslega markmið Google að ráðast nú að höfuðvígi Microsoft með skýrari heildarsýn á framtíðina. Framtíð sem byggir á ódýrum aðgangi að Internetinu og sítengingu hvar og hvenær sem er. Og líka framtíð sem byggir á ódýrum og litlum tækjum sem hægt er að nota til að vafra um netheima og eiga samskipti við vini og samstarfsmenn.

Myndin er að skýrar og hvert sem litið er getur þú nú notað kerfi frá Google:

• Google Chrome til að vafra um netið á Windows, Linux eða Mac vélum
• YouTube til að skoða og deila myndböndum
• Picasa til að skoða og deila myndum
• GMail fyrir allan tölvupóst
• Google Reader til að fylgjast með fréttum og bloggi
• Google Docs fyrir ritvinnslu, töflureikni og kynningar

Að sjálfsögðu tengir Google líka framtíðarstýrikerfið við Google Friend Connect sem gerir það mun öflugra en Facebook, Twitter og önnur félagsnetverk.

Nú verður fróðlegt að sjá hvort og hvernig Microsoft ætlar að bregast við…

Hvað heldur þú?

Icesave og aðrar skuldir

Það er nú talsverður munur á “venjulegum” skuldum ríkisins og svo icesave. Aðrar skuldir hafa yfirleitt raunveruleg verðmæti á bak við sig. Fyrir okkur er icesave bara skuld – engin verðmæti. Icesave er túlkun á lögum um tryggingarsjóð innlána.

Ég hef aðeins á tilfinningunni að það hafi verið talið nauðsynlegt að semja til að ákveðnir menn gætu haldið andlitinu (t.d. Davíð Oddsson og Árni Mattiesen sem skrifuðu undir viljayfirlýsingu og Davíð Oddsson, Geir H. Haard , Ingibjörg Sólrún og Björgvin Sigurðsson sem marglýstu yfir hversu traustum fótum bankakerfið íslenska stæði á). Sorry – þetta er bara allt of stórt mál til þess að láta einstaklinga – og tilfinningar þeirra – þvælast fyrir.

Held að við verðum að finna varnir sem duga fyrir þjóðina hvað sem það kostar. Nú tala ég sem þjóðin 🙂

Munum að þingmenn starfa í umboði þjóðar (okkar) og við getum tekið það aftur þegar við viljum (eins og sannaðist á Austurvelli í vetur). Það hljóta að vera takmörk fyrir því hversu mikið Alþingi getur skuldbundið þjóðina.

Við viljum réttlæti (málið fyrir dóm) og sanngirni (ekki hærri greiðslur en hægt að ráða við).

Það eru nokkur atriði sem þarf að hafa í huga:
1. Fólkið (almenningur) sem á að borga “lánið” fékk aldrei neinn pening.
2. Bretar beittu hryðjuverkalögum.
3. Tryggingarsjóður innlána ætti að greiða þetta (getur það reyndar sennilega ekki)
4. Af hverju er málið ekki sett fyrir dómstóla?

Mér finnst allavega eitthvað vanta í þessa mynd ennþá…

Ef til vill er best að lýsa einfaldlega yfir þjóðargjaldþroti. Sætta sig þannig við orðinn hlut og byrja upp á nýtt með hreint borð.

Bendi hér á nokkrar nýlegar greinar um icesave sem ég mæli með að þú lesir:

Jón Daníelsson: Þennan samning verður að fella
Jón Baldvin Hannibalsson: ICESAVE Í iÐNÓ – HREINSUNARDEILD VG
Ólafur Arnarson: Icesave þjóðviljinn

Hvað finnst þér?