Kjallarinn.net

Author: Þrándur

  • Alheimsstríð lánardrottna

    Dr. Michael Hudson skrifar athyglisverða grein í Fréttablaðið.  Þar bendir hann á að nú er í gangi alvarlegt efnahagslegt “stríð” þar sem lánardrottnar eru að soga allar eignir til sín með gríðarháum vöxtum. 

    Með því að heimta okurvexti af skuldsettum fyrirtækjum, heimilum og ríkjum eru þessir aðilar settir í skuldafjötra.

    Hann segir t.d. blákalt:

    Bandaríkin eru skuldugasta þjóð heims og mun aldrei greiða erlendar skuldir sínar.”

    Það sérstaklega íhugunarvert að lesa hvernig hann líkir ástandinu við stríð. Fjárhagslegi hernaðurinn er bara ekki eins sýnilegur. Afleiðingarnar geta hins vegar orðið afar alvarlegar:

    • Styttri meðalaldur
    • Færri fæðingar
    • Vinnuafl flýr úr  landi
    • Hækkuð sjálfsmorðstíðni
    • Sjúkdómar og fleira

    Verst er að þeir sem fara úr landi eru oft fólk á verðmætasta aldrinum 25-40 ára.

    Eftir stendur spurningin til íslenskra stjórnmálamanna (og kollega þeirra í öðrum löndum):

    Munu stjórnvöld standa vörð um hag íslenskra heimila eða hneppa þjóðina í skuldafangelsi?

  • Stóru málin…

    Andri Geir Arinbjarnarson var í Silfri Egils um daginn og átti ágætis innlegg.

    Á blogginu sínu telur hann upp öll stóru málin:

    • Allir bankar fallnir og viðreisn bankakerfisins óviss
    • Ónýtur gjaldmiðill sem krefst hárra vaxta og hafta til að skrimta á innlendri grund
    • 75%  fyrirtækja á leið í gjaldþrot eða greiðslustöðvun
    • 20% heimila í neikvæðri eignastöðu og gríðarlegir greiðsluerfiðleikar hjá enn fleirum
    • Sívaxandi atvinnuleysi
    • Skuldafen Íslands eitt það versta á byggðu bóli
    • Tekjustofnar ríkisins hafa hrunið og velferðarkerfið í uppnámi
    • Enginn aðgangur að erlendu fjármagni nema með aðkomu AGS
    • Icesave og erlendar kröfur ófrágengnar
    • Stjórnmálamenn ringlaðir og flokkarnir flestir stefnulitlir
    • Þjóðin reið, óttasleginn, tortryggin og bitur

    …og bendir á að við eigum bara tvo kosti í stöðunni. Alþjóðagjaldeyrissjóðinn og Krónuna EÐA Evrópusambandið og Evruna.

    Mjög sammála þessu hjá honum. Á sama tíma er alveg ótrúlegt hvað stjórnmálamennirnir virðast vera hræddir við að tala um þessi stóru mál sem blasa við. Virðist sem þeir séu hræddir við að tala um hlutina eins og þeir eru.

    Nú þyrfti Íslenska þjóðin einhverja virkilega framsýna menn við stjórnvölinn. Atvinnuþrasarar og fyrirgreiðslupólitíkusar mættu fara í smá frí. Því miður virðast ekki vera neitt stórkostlegar breytingar í mannvali stjórnmálaflokkanna – ekki frekar en á undanförnum árum.

  • Framtíð Íslands – Nýtt Lýðveldi

    Loksins er kominn maður sem þorir að taka umræðuna um framtíð Íslands á næsta stig.

    Allt of mikill tími hefur farið í að sannfæra ríkisstjórnina um að hún er löngu fallin. Í dag áttaði Björgvin G. Sigurðsson sig á því og sagði af sér (og er meiri maður fyrir).

    Það er líka mikið áhugaverðara að horfa fram á veginn og ég er sammála því að það þarf að búa til alveg nýtt lýðveldi á Íslandi. Þess vegna styð ég þetta framtak og hvet þig til að gera það líka:

    Nýtt Lýðveldi

    Að þessari undirskriftarsöfnun stendur hópur Íslendinga sem telur brýnt að hefjast nú þegar handa við að endurreisa traust í þjóðfélaginu og efla virðingu fyrir reglum lýðræðis og grundvallarstofnunum samfélagsins.

    Fólkið í landinu þráir nýtt upphaf og nýjar leikreglur ásamt endurreisn þeirra gilda sem þjóðin hefur um aldir lagt rækt við, gilda á borð við heiðarleika, samvinnu, ábyrgð og jöfnuð.

    Við viljum með þessu framtaki mynda þverpólitíska breiðfylkingu um þau markmið sem koma fram í áskoruninni til forseta og Alþingis.

    Hópurinn er óháður öllum stjórnmálaframboðum og hagsmunaöflum.

    Njörður P. Njarðvík,

    Ólína Þorvarðardóttir,

    Tryggvi Gíslason,

    Birgir Björgvinsson.

  • G. Pétur og Geir. H. Haarde viðtalið…

    G. Pétur var að taka viðtal við G. Haarde snemma árs 2007. Þetta er fyrst og fremst kennslustund í því hvernig á EKKI að tala við fjölmiðla (sem eru jú fulltrúar þjóðarinnar í tilvikum eins og þessu).

    Oft áhugavert að sjá hvað menn segja þegar þeir halda að það sé búið að slökkva á myndavélinni…

    Annars er þetta hreint ótrúlegt ástand og virðist sem stjórnvöldum sé algerlega fyrirmundað að sjá stóru myndina:

    -Fólk missir vinnu

    -Laun lækka um helming

    -Fasteignir lækka um helming

    -Skuldir lækka ekki

    (allt þetta miðað við alvöru gjaldmiðil)

    Afleiðingin er að fólk og fyrirtæki flýja land og eftir standa auð hús. Stefnir allt í að gerist eins og í Færeyjum þar sem nú vantar 9000 manns m.v. eðlilega þróun. Hér gætu því horfið 60000 manns varanlega.

    Nú er mikilvægt að ráðamenn komi sér að verki.

    Stund sannleikans er að renna upp.

    Kannski var hugmyndin um þjóðstjórn ekki svo slæm eftir allt saman…???

  • Útrásin dauð?

    Það hefur nú ýmislegt gengið á í efnahagslífi íslendinga undanfarnar vikur og oft rætt um útrásina sem eitthvað neikvætt. En það er nú samt svo að í allri þessari kreppuumræðu vill svolítið gleymast að það eru enn til útlönd og það eru enn til kaupendur að ýmis konar vöru og þjónustu á erlendri grundu.

    Ég er sannfærður um að nú er enn meiri þörf á námskeiði eins og þessu. Við höfum mikla þörf fyrir að byggja upp raunverulega útrás þar sem hægt er að breyta hugmyndum í markaðssetta vöru á alþjóðlegum markaði. Námskeið eins og þetta getur hjálpað mörgum einstaklingum sem hafa hugmyndir en vita ekki alveg hvernig hægt er að koma þeim á framfæri.

    Sala á vöru og þjónustu til erlendra kaupenda skapar gjaldeyri sem ekki er vanþörf á á þessum tíma.

  • Sterling RIP Myndböndin

    Nú eru komin tvö myndbönd á YouTube um Sterling flugfélagið og aðkomu Pálma Haraldssonar, FL-Group/Stoða, Fons og fleiri að þessum sérkennilegu viðskiptum sem enduðu með gjaldþroti Sterling.

    Verð að viðurkenna að ég er ekki nógu góður í bókhaldi til að skilja allar þessar æfingar. Finnst þessar sölur þó óneitanlega vera afar vafasamar. Virðist vera sniðug leið til að prenta peninga.

    Einhvern veginn virðist það vera að smákrimminn sem stelur einhverjum þúsundköllum, næst og er dæmdur. Eftir því sem menn stela meiru virðist vera auðveldara að sleppa og kallast þá viðskiptasnilld. Steldu nokkrum milljörðum og þú ert alveg öruggur.

    Full ástæða væri til að vandaðir blaðamenn tækju þetta mál fyrir af alvöru…

    Hvað finnst þér?

  • Geir og Sigmar í Kastljósinu

    Gaman að sjá Sigmar þjarma loksins að Geir í Kastljósinu í kvöld. Fyrsti fjölmiðlamaðurinn sem gerir það af einhverri hörku. Þetta eru stórar spurningar og alveg ótrúlegt stefnuleysi sem virtist koma í ljós.

    Að ekki megi enn tala um að mistök hafi verið gerð.

    Var það ekki Davíð sem sagði eitthvað um að hætta að moka ef maður væri kominn í holu?

    Egill Helga segir líka vel frá þessu – fín umræða þar alltaf…

    Hér þarf alveg nýja hugsun og framtíðarsýn – ekki nóg að ausa bara og ausa.

  • Ótrúleg saga af okri…

    Ég fór í byggingarvöruverslun í dag og var að kaupa smá bandspotta til að endurnýja þvottasnúrurnar. Fékk eina 30 metra af þægilegu bandi.

    Þegar ég kem á kassan set ég spottann á afgreiðsluborðið og rétti stúlkunni miðann með vörunúmerinu.

    Stúlkan: “Þetta verða þá: Fjórtán þúsund níu hundruð og nítíu”

    Ég: “Það getur nú varla verið. Þetta er nú bara bandspotti. Kostar kannsi 25 kall metrinn – og þetta eru 30 metrar.”

    Stúlkan: “Já – einmitt. Þetta var metraverðið. 30 metrar eru fjögurhundruð fjörtíu og níu þúsund og sjö hundruð.”

    Ég (heyrði ekki alveg þegar hún sagði “þúsund”): “Fjögur hundruð fjörtíu og níu – það er nú nær lagi!” – rétti henni kortið.

    Stúlkan (án þess að stökkva bros): “449.700” – og gerir sig líklega til að strauja kortið.

    Þetta var eiginlega hætt að vera fyndið og ég greip af henni kortið í snarhasti.

    Málið leystist auðvitað farsællega með því að stúlkan fór og kannaði málið betur og ég sparaði næstum hálfa milljón 🙂

    Þarna var verið að treysta í blindni á eitthvað kerfi sem eins og önnur kerfi eru alltaf full af mannlegum mistökum á öllum stigum.

  • Tvífarar – Trölli og Geir H. Haarde

    Fékk sendar þessar áhugaverðu tvífara myndir:

    Grinch
    Trölli
    Geir H Haarde
    Geir H Haarde

    Samsæriskenningasmiðir sjá oft skemmtilegar samlíkingar.

    Þessi er nú ekki spurning. Vona bara að Trölla takist ekki að stela jólunum.

  • Dýr Mistök Seðlabankastjóra

    Já, þau ætla að verða býsna dýr, mistök Seðlabankastjóra.

    Það er of ódýr lausn að kenna bara “útrásarvíkingunum” okkar um hvernig farið hefur. En það hljómar kannski vel.

    Hrun fjármálakerfis landsins má því miður rekja að verulegu leiti til mistaka Seðlabankastjóra á síðustu dögum. Nokkur dæmi um mistök og afleiðingar:

    • Davíð Oddsson hefur staðið gegn evru umræðu og Evrópusambandsaðild. Afleiðingin er veikur gjaldmiðill sem stenst ekki í þeim fellibyl sem geysar á fjármálamörkuðum heimsins.
    • Of háir stýrivextir. Gera íslenskum fyrirtækjum ákaflega erfitt fyrir að starfa með eðlilegum hætti í samkeppni við erlend fyrirtæki. Fjármálaspekúlantar hafa líka getað notfært sér ástandið til að hagnast óeðlilega og beita krónuna þrýstingi.
    • Seðlabankinn ráðlagði ríkisstjórn Íslands að taka yfir Glitni. Þetta olli keðjuverkun sem enn sér ekki fyrir endann á, þar sem Landsbankinn og óbeint Kaupþing hafa fallið í valinn. Auðvelt að vera vitur eftir á, en hér hefði mátt hugsa málið í nokkra daga og nýta þann tíma sem var til stefnu (þar til afborgunin átti að eiga sér stað). Því miður skorti ríkisstjórnina hugrekki til að kljást við Seðlabankann. Skaðinn af þessari ráðgjöf hleypur á hundruðum milljaraða eða meira. Stærri tölur en gott er að átta sig á.
    • Davíð Oddsson ráðinn í stöðu aðal Seðlabankastjóra. Sumir segja nánast af honum sjálfum. Þetta er dæmi um afspyrnulélega dómgreind og mistök þar sem seðlabankastjórar eiga að vera fagmenn og fara sér hægt í yfirlýsingum og koma með skynsamlegar ráðleggingar ÁN pólitískra tengsla.
    • Ummæli Davíðs í Kastljósi. Þar sem Seðlabankastjóri fór mikinn og sagði að Íslendingar myndu ekki greiða erlendar skuldir bankanna. Þetta var auðvelt fyrir breta að túlka á versta veg og Gordon Brown forsætisráðherra gerði það svo sannarlega. Hann fór reyndir verulega fram úr eðlilegum viðbrögðum með því að nota lög um hryðjuverkastarfsemi.

    Staðreyndin er sú að allir þrír bankarnir stóðu vel en áttu í LAUSAFJÁR vandræðum. Skuldasafn þeirra var tiltölulega gott og sæmilega stjórnað, þó deila megi um ofurlaun o.fl.

    Að lokum legg ég til að Davíð Oddson og hinir seðlabankastjórarnir verði settir af nú þegar.

  • Seinna Myndbandið um Glitni

    Þá er seinna myndbandið um Glitnisævintýrið komið í ljós.

    Þetta mál allt vekur óneitanlega fjölmargar spurningar:

    • Voru einhver lög hafi verið brotin og hverjir frömdu þau lögbrot?
    • Var Fjármálaeftirlitið ekki nógu öflugt?
    • Brast efnahagsbrotadeild ríkislögreglustjóra þekkingu og mannskap?
    • Átti Seðlabankinn að grípa fyrr inn í?
    • Hvað með ríksstjórnina og Alþingi – eru þau ekki vaxin hlutverki sínu?

    Í framhaldi af þessu hlýtur að vera komið að samskonar videoi um Landsbankann og aðra skuggalega afkima íslensks fjármálalífs.

  • Glitnir: Myndbandið

    Var að fá eftirfarandi póst:

    Áhugavert myndband um ríkisbankann. Ég mæli með því að menn hækki hljóðið, halli sér aftur í stólnum og slái taktinn ef það má vera til þess að menn gleymi um stund efnahagsástandinu.

    Kv. R.

    …já áhugavert út frá því hvernig sömu menn (að hluta til) hafa farið með eigur FL Group.

    Fer að minna á það sem Everett McKinley Dirksen sagði einu sinnI: “A billion here, a billion there, and pretty soon you’re talking about real money.”